Granchius
Antonio Romeo
Chiovi pur'oji
Chiovi
pur'oji mannaia lu nimicu;
ma chi cazzu d'agustu è chistu ccà?
Und'è la stati, cu' si la pigghiau?
E undi la portau stu delinquenti?
Cu po' pigghiari pigghia di sta terra
E mò puru lu suli nd'arrobbaru.
L'atrh'anni di sti tempi si chiovìa,
di suduri chiovìa sup'a lu frunti,
ma n'terra nc'era sempi purvarata,
e no' gurnejhi nommu po' passari.
No' ndi vindìanu umbrelli di sti tempi
Mastrhu Petrhu e lu Riggitano:
mostrhavanu sulu li custumi
m'ammuccianu carcosa a li cotrhari
quando jianu a lu mari pe' li bagni
e mu s'arrocculannu 'ntra la rina.
Mi dispiaci assai pe' "Caterina",
mo' accussì si chiama Catuzzejha,
ca non lu po' mostrari lu vijhicu,
cu 'na petrha lucenti 'mpiccicata,
a mò di friccia, comu ntra li strhati
chi mostrhanu pe' undi mu si vaci.
"Ma chi diciti?, m'issi nu cristianu,
"o vui sit'orbu, oppuru non biditi;
guardati sup'a chijhu marciapiedi,
guardati quantu fimmani spogghiati
vannu pe' sutta e supa ballariandu
e mostrhandu li cosci e li minnejhi.
Chist'è lu tempu chi tutti li cotrhari
Si chiovi, nc'è su suli, o tira ventu
Si ndi futtinu e vannu zzumpariandu,
mostrhandu chijhi cosi chi vi dissi
e chi, cridit' ammia, ca è verità,
Tentanu puru a l'Angelu Custodi.
(Satiricus 2002)
www.cinquefrondi.com - ©2000,2005
|
