Granchius
Antonio Romeo
Lu Spazzinu
Chi ti custa, spazzinu vacabundu,
lu jornu,quando pigghj li mundizzi,
mu chiudi lu bidoni ch'è vacanti?
Non t'allordi, sta'certu; ca li sguanti
T'accuppanu li mani dilicati
E senza d'ijhi, propriu non poi stari:
nci teni assai pe' la tua saluti,
ma di lu restu no t'importa nenti.
Se ti ricordi, bruttu vejhanazzu,
l'annu passatu vinni mu t'arrivu
mentrhi 'nchianavi 'ntra lu motocarru
chi nu cumpagnu toi faci mu roci
cu nu frastonu amaru chi la genti
a' mu si stuppa l'aricchji nommu senti.
E ti pregai, cu boni maneri,
mu lu chiudi ca si lu dassi apertu
sutt'a lu suli gugghji lu fumeri
e ndi mpommica tutta la jornata.
Ma tu petrha! Non ti dasti ntisu
Tu fai lu stessu puru chist'estati.
E tu lu sai ca, di n'annu a n'atrhu,
nujhu li lava mai chijhi bidoni
e puzzanu di cani mortu, già mpurrutu.
Era megghiu quandu la mundizza
La pigghiiavanu 'Mbatti e Valensisi
E la cogghjianu sup'a na carretta
Tirata di nu ciucciu scontrhicatu
Mu la jiettanu versu la chjiumara,
luntanu di li casi e di la genti.
Mah!... Sai chi ti dicu?
Fa chi cazzu voi... Tantu,
pigghji lu stessu la misata,
ca nujhu si ndi futti a 'stu paisi
se tu fatighi o fai lu vacabbundu.
E lu bidoni mi lu chiudu eu,
e senza sguanti, ca non mi nosiju.
(Satiricus 2002)
www.cinquefrondi.com - ©2000,2005
|
